Lütfen bekleyin.. Lütfen bekleyin..
Dewlete hertim seba pawitiş û xurtkerdişê estena xo mîyanê gêrayîşî de ya. Tabî no gêrayîş seba menfîetê şaran nê, seba domnayîşê îqtîdarê xo yo faşîst yeno kerdiş. Raştîya îqtîdaranê faşîstan hîna zaf bingeyê xo zîhnîyetê tekperestî yê netewdewlete ra gênî. No zîhnîyeto tekperest; heme rengan çinî hesibneno û estena xo çinîkerdişê heme rengan de vîneno. Yan zî zaf renginîye û cîyayîyan seba îqtîdarê xo sey tehlukeyî vîneno û seba ke nê cîyayî û renginîye orte ra wedarno her tewir hêriş û qetlîyaman xo rê mubah vîneno.
Faşîzmê AKPyî zî bingeyê estena xo tekperestîye ra gêno û xo ser tekperestîye ra miqate keno. Polîtîkaya Serekkomar Erdoganî ke bi vatişê ‘tek dewlete, tek beyraqe, tek milet, tek ziwan û hetta tek bawerî’ formule kena, raştîya xo de zîhnîyetê tek tîpî dîyar kena. Na polîtîka hetê komelkî, ekonomîk û sewbîna heme hetanê cuye de erzîyena dewre. Hetta na polîtîka hîna aver şona û sey tek fikir, tek tarzê cuye û cilê tek tîpî yena averberdiş. Îqtîdarê AKPyî no het de heme tecrubeyanê faşîzmê 12ê Êlule ra dersan vejeno û polîtîkayê ke înan derbaz kenî, erzeno dewre. Nê kerdişî heme faşîzmê 12ê Êlule rê rehmet wanenî.
Cayê ke faşîzmê AKP û MHPyî yê qetilkerî nê polîtîka û qeraran hewl danî bierzî dewre ra yewe zî zîndan î. Dagîrkerîya AKP û MHPyî ya faşîste her roje polîtîkayanê tekperestan bin nameyê zura ‘seba parçenebîyayîşê welatî’ komelî ser de ferz kena. Na dagîkerîye nê fehmî ser ro hewl dano komelî ser de hakimîya xo awan bikera û bi no hawa sîstemê yew kesî awan bikero. Nê tek tekan ra yê tewr nîjadperest sunîtî û tirkîtî yî. Tekperestîya ke mîadê xo pirr kerdo, bêxera parekerdişê îqtîdarî sewbîna çî nîyo.
Cewherê cila tek tîpî zî no yo. Bitaybetî kesê ke sebebanê sîyasîyan ver ameyî tewqîfkerdiş ser de ferzkerdişê cila tek tîpî, seba awankerdişê merdimo tek tîpî yo. Keso ke vera sîstemî de yo, xora seba ke vera tekperestîye de yo, ameyo tewqîfkerdiş. Labelê seke no bes nêbo, hewl danî fikrê cîyayan zî bikerî tek tîp û no vera heq û huqûqê merdimîye de hêriş û îşkence yo. Herçiqas ke faşîzmê AKPyî seba nêyî tayê mehneyan bigêro zî, cewherê xo de çîyo ke beno no yo. Nika hewl danî zîndanan de bi cilanê tek tîpan hepsîyan teslîm bigîrî. Labelê çîyêko xo vîra kenî zî no yo ke vanî qey do hepsîyî ca de teslîm bibî. Senî ke serranê 1980î de cila tek tîpe nêameye qebulkerdiş ewro zî nîna qebulkerdiş. Bi deshezaran hepsîyê ke ameyî tewqîfkerdiş xora seba ke vera tek tîpî de bî, ameyî tewqîfkerdiş. Hepsîyê ke vera nêyî de yî, do nê qerarê faşîzanî zî nas nêkerî û cila tek tîpe zî xoranêdî. Xora hepsîyan îzeh kerd ke ê do vera nêyî de têkoşîn bidî.
No qerar seba şîyayîşê ver bi tirkîtî û sunîtî muhîm yeno dîyayîş. No qeraro faşîzan tena hepsîyan nê, heme komelî eleqeder keno. Hetta ameyoxa komelî ser o do tesîrêko cîddî zî bikero. Vera cila tek tîpe de xoverdayîş, qebulnêkerdişê dagîrkerî û zextî yo. Cok ra her kes, dezge û sewbîna ganî beşdarê xoverdayîşê hepsîyan bibo, têkoşîn bido, veng bivejo û wayîrê rûmetê merdimîye bivejîyo. Hepsîyan ra ver ganî hetê polîtîkî û dormeyê demokrasî vera na rewşe de bivinderî û çalakîyan bivirazî. No hem berpirsîyarîya ehlaqî û hem zî ya wijdanî ya. Eynî wextî de no vindetişêko şorişgêr û polîtîk o. Seba nêyî ma veng danî herkesî ke wa vera tek tîpî de vengê xo berz bikerî û têkoşîn bidî.
Fatma Adır / Politika
