Lütfen bekleyin.. Lütfen bekleyin..
Bi rojan o herême de şewatê daristanan dewam keno. Bitaybetî Dêrsim, Şirnex û Licê de netîceyê bombevarnayîşê helîkopter û bi hawayo qestî veşnayîşê leşkeran de daristananan de şewat vejîyayo û no şewat bi rojan o ke dewam keno.
Dêrsim de vera şewato ke dewam keno de temsîlkarê partîyê sîyasî û rêxistinê dezgeyê sîvîlî ameyî têhet û bînaya Komeleya Elewîyê Demokratîkî (DAD) de kombîyayîşêk viraştî. Parlamenterê HDPyî yê Dêrsimî Alîcan Onlu, Parlamenterê CHPyî yê Dêrsimî Orhan Saribal, Baroya Dêrsimî, Odeyê Tîcaret û Sanayî yê Dêrsimî, ÎHD, Meclîsê Wa Munzur Bi Hawayo Azad Biherîkîyo û sewbîna xeylê dezgeyê bînî zî beşdar bîyî.
Kombîyayîş de sifteyîn Parlamenterê HDPyî Onluyî qisey kerd û wina va: “Ti kes nêşêno vera şewato ke bi rojan o dewam bikero de bêveng bimano. Şewatê ke 2 hewteyê peyênan de vejîyayî heme zî bi hawayo hemwext vejîyayî. Kurdistan û Dêrsim de şewatê girdî estî. Her kes bi hawayo morcellayan keda xo kirişeno û hewl dano şewatî bimirêno. Ez seba heme dezge û rêxistinan rê spas kena.”
Vera tebîetî de sucê şerî beno
Dima ra Serekê Baroya Dêrsimî Bariş Yildirimî zî wina va: “Hîkayeya şewatê ke herême de vejîyenî eynî yî; muhîmmatê şerî ke herême de yenî xebetnayîş ver şewat vejîyeno. Ma sey Baroya Dêrsimî gerreyê sucî kerdo. Çarçewaya Statuyê Roma yê Mehkemeya Ceza ya Mîyanneteweyî hêrişê ke zirar danî tebîetî, sucê şerî yî.”
Yildirimî ra dima Parlamenter Saribalî zî dîyar kerd ke ganî her kes bi hawayo ehlaqî û wijdanî nê şewatî ra vajo vindere. Saribalî dewamê qiseykerdişê xo de wina va: “Dinya de tena çîyêko esto ke bi pereyê nêgirîyeno; aye zî rindîya tebîî ya.”
Dêrsim de 18 herêman de şewat dewam keno
Dêrsim de bi mehneya ‘Operasyon esto’ de 18 cayan de mudaxaleyê şewatê daristanan nîno kerdiş. Şewat 18 cayê ke girêdayeyê qezayê Pulur, Xozat, Pîlemurîye û Qisle yê Dêrsimî de dewam keno. Qezayê merkez, Qisle, Xozat, Pulur, Çemîşgezek û Pîlemurîye de zî reaksîyonê şarî vera şewatan de her ke şono gird benî.
Seba ke mudaxaleyê şewatî nîno kerdiş, çend rojî verê 50 kesî ameybî têhet û seba ke şewato ke merkez de vejîyabî bimirênî, şîybî herêma Kutuderesî. Labelê hêzê dewlete seba ke herême de mayînî estî, destûr nêdaybî na grûbe.
Cayê ke şewatî tede dewam kenî, nameyê înan wina yo: qezaya Pulurî de dewa Yaylagunu, Daristanê Sepkanî, dewa Kozluca, Merkezê Dêrsimî de dewa Saritaşî, Geyîksu, Kutuderesî, Newala Rojî, Newala Balî, qezaya Xozatî de herêma Amutkanî, dewa Çakmakli û Dere, qezaya Çemîşgezekî de Newala Ekerekî, qezaya Pîlemurîye de dewa Kizilmecîtî, Kirmizi Kopru, Dereboyu, Uzuntarla. Qezaya Qisle de dewa Dogantaş û Ramadanî. Bitaybetî herêma Geyîksu, Newala Rojî û Dogantaşî de şewat her ke şono zêde beno.
Heto bîn ra dewa Dêrxustî ya ke girêdayeyê qezaya Licê ya Amedî ya de netîceyê bombevarnayîşê leşkeran de şewat vejîyabî, ame musayîş ke şewat hetê şarî ra ameyo kontrolkerdiş.
DÎHABER/DÊRSIM
