Lütfen bekleyin.. Lütfen bekleyin..
Guman çîn o ke girê Dêrsimî zaf ê. Girê zonê dayike, girê zagonî, girê asîmîlasyonî, girê bendû, girê bêkarênî û girê cênîyû nînû ra tayîne yê. Hata na rozû jû(yew) gireyo bîn ma hen zanitene ke endî peyde mendo, hama(labele) hen nêbîyo. Merdena Qemer Gencî ra reyna(defêna) bî eskera kî (zî) wertê girê Dêrsimî de hona sewdaya Tuncelî kî bîya. Merdena Qemer Genc ra dima, tayîne jêde înternet ser ra sîyasetê ey kritîk kerd. Nê kritîkû rê cav dayene nîya bimano, tayîne ebe(bi) milqî dismenîya xo areze kerde.
Nîyê ke xo nêzanenê nînû(nînan) ra tayê Dêrsim ra nêbî, hama çi hêfo ke wertê nînû de tayê kî Dêrsimîjî bî. Nînû tolde de çiqaşe vatê xo kî bîyê, merdena Qemer Genc ra dima arde ra zon. Qamer Genc kemalîst bî û weşîya xo kî ney ra gorê ramite. Helbet kes jê(sey) î yê bîn nêfikirîno û krîtîk nêkeno. Hama hen aseno ke tayê hona(hîna) dismenîya kurdû cîa nêverda. Çike tenê ke nahure, nîyadana ke qese ane, benê kurdû ser de gîredanê. Oxro ke tayê kritîkû de çekuyo kurd bîla nêvêrene. Sîyasetê ey ke qeseybî nîyadame ke tayê desinde ardimdayîşê ey, hemşehrinêna ey, bêkarû rê kar vênitena ey vanê. Hîya raştîya nê kî rindîyê ey ê, hama xeletîya sîyasetê ey ça mevajîyê. Tayîne waşt ke qe(qet) kes xeletîyûnê ey mevazo, pêro ey bigoynê. Kes qusir de nîyamedo, dinya ya nîyanene çîn a. Vajîme; serrîyûnê vêsayîşê Dêrsimî de Qemer Genc ça DYP ra (1996-2001) bîbî mebus? Leyê Tansu Çiller û Mehmet Agar de karê xo çi bî?
2007îne de jû program de vat; “Zanenê miletê ma o cawû de kurd o…”, 2011 de xo çarna vake; “Nê ma kurd nîme. Ma tirk îme.” Oncîa 29.11.2011 de BDP meclîs de jû teklîf dayîbî. Waştene ke jênosîdê Dêrsimî ser o qomîsyonê nîvîknayîşî ronîyo. Qemer Genc, qese guret û vake; “Ala nîvîknayîş(cigêrarîş) bikerîme, belqa serva ef waştene çîye nêbîyo.” Ya(yan) kî; “38 de eşîrî qeseyê dewlete(duwele) gos nêdê, dewlete mecbur menda o sevet ra esker rusno uca ser”, vazo kî çîyê mevajîme henî yo? Teyna bigoynîme, qe xeletîye ey mevajîme! Nê hurenayîşû ser o 10ê Gaxan 2011 de Dêrsim de jû mîtîng virajîya. Bêgunayê 1938î ra hîre Dêrsimîjî -jû cuanike bîye- vejîyayî platform dirvetê xo kerd ra û misnayî qomê xo. Qenêbo însan bisermayîyo. 19 Gulane 2011 de mîtîngê Kiliçdaroglu ra raver, rae de ebe kirmanckî ‘xêr ama’ deyin tayê pankartî darde kerdîbî, hama Qemer Genc nê pankartî ardî war. Oncîa 30.09.2012 de jû ca de nameyê Dêrsimî peyser dayene ser vano; “ Harîta Tirkîya de Dêrsim deyin jû ca esto? Çîn o, Tuncelî esto…” Yanê duştê nameyê Dêrsimî de cayê xo leyê MHP û Perînçekî de vênitibî. Par ke şîbî Dêrsim, jû xebere de bêsika xo sanene ra vatene; “Îta dewlete çîn a. Eke dewlete bibo gereke TSK karê xo bikerdêne…” Ma xojîvê ey û haskerdoxûnê ey bo. Dewlete ewro karê xo kena! Werte na miz û dûman de tayê çitur nîya bêwîjdan manenê, no kî beno zobîna çî yo.
Qemer Genc şî heqîya xo. Endî raştîyê ey û xeletîyê ey tarîx kî nusneno. Hama gereke nîye ke hona weşîya xo ramenê nînû ra jû persê xo pers bikerîme. Ebe vijdanê sima de cayê Tuncelî kotî yo, cayê Dêrsimî kotî yo?
